ඇත්තටම අපිට අපේ විදේශ ණය ගෙවා ගන්න පුළුවන් ද ?
10, January 2022
1 min read
2021 ජනවාරී 18 ලංකාවට ගෙවන්න තියෙන ණය වාරිකයත් සමග ණය ගැන ගොඩක් දෙනෙක් කතා කරනවා. වර්තමානයේ ලංකාවේ ඇතිවෙලා තියෙන ණය අර්බුදය, දශක ගනනාවක් තිස්සේ සැලැස්මක් නොමැතිව ණය ලබා ගැනීම් වල ප්රතිඵලයක් ලෙස දකින්න පුළුවන්. සාමාන්යයෙන් රටක් ණය ලබා ගන්නේ ප්රධාන ලෙස කාරණා 3 කට.
-
අයවැය හිඟය පියවන්න
-
විශාල වශෙයන් සිදුකරන යටිතල ප්රවර්ධන වැඩසටහන් සදහා
-
නොසිතු ලෙස ඇතිවෙන ආර්ථික කම්පනයන් සදහා මුහුණ දීමට
ශ්රී ලංකාව පමණක් නොවෙයි ලෝකයේ හැම රටක්ම පාහේ ණය අරගෙන තම ආර්ථික කටයුතු සිදු කරනවා. එතකොට ගොඩක් දෙනක් අහන ප්රශ්නය තමයි අනිත් රටවල් වලට ණය ලබා ගෙන ආර්ථිකය අරගෙන යන්න පුලුවන් නම් ඇයි අපිට එහෙම කරන්න බැරි කියලා. අපේ රටේ මේ ඇති වෙලා තියෙන ප්රශ්නයට ප්රධාන හේතුව තමයි අපි ගත්ත ණය හරි විදියට කලමනාකරණය කරන්නේ නැති එක. සමහරක් ණය අරගෙන තියෙන්නේ රාජ්ය අංශයේ ණය ගෙවන්න හා රාජ්ය අංශයේ වැටුප් ගෙවන්න, තවත් ණය අරගෙන තියෙනවා නැවත ප්රතිලාභයක් නොලැබෙන ගොඩනැගිලි හා ව්යාපෘති සදහා. ආර්ථික විද්යාවට අනුකුලව ගන්න ණය නිසි ලෙස ආයෝජනය කල යුතුයි. ඒ කියන්නේ අපි ඩොලර් වලින් ණයක් ලබා ගත්තා නම් අපි ඒ ණය ආයෝජනය කල යුත්තේ අපිට ඩොලර් වලින්ම ප්රතිලාභයක් ලැබෙන දෙයක් සදහායි. අපි ඒ ණය මුදල රුපියල් වලින් ප්රතිලාභ ලැබෙන දෙයක් සදහා යෙදුවොත් වෙන්නේ අපි මේ සල්ලි ඩොලර් වලට මාරු කරන්න ඕනේ. ඊට අමතරව අපි මේ ණය ආයෝජනය කල යුත්තේ ඒ ලැබෙන ප්රතිලාභයෙන් ගත්ත ණයයි පොලියයි දෙකම ගෙවීමට පුළුවන් වෙන විදිහට. අපිට ප්රතිලාභයක් නොලැබෙන ව්යපෘති සදහා මේ ගන්න ණය ආයෝජනය කිරීමෙන් සිද්ධ වෙන්නේ අන්තිමට ඒ ණයත් අපේ භාණ්ඩාගාරයෙන් ම ගෙවීමට සිදු වෙන එකයි, ඒ කියන්නේ වක්ර ලෙස රටේ ජනතාවගේ සල්ලි වලින්ම තමයි ඒ ණය ගෙවන්න සිද්ධ වෙන්නේ. .
කලින් ඉදපු රජයන් මොන හේතුන් වලට හෝ ණය ලබා ගත්තා, අපි දැන් බලන්න ඕනේ අපිට ඇත්තටම කොච්චර විදේශ ණය ප්රමාණයක් ගෙවන්න තියෙනව ද කියලා.
ඉහත පෙන්වා ඇති ප්රස්ථාරයට අනුව අපිට ගෙවන්න තියෙන ණය ප්රමාණය අවුරුද්දෙන් අවුරුද්ද වැඩිවෙනවා මිසක අඩුනම් වෙන්නේ නෑ. 2022 වර්ෂය සදහා ඒ.ජ. ඩොලර් බිලියන 4.5 මුදලක් ගෙවන්න තියෙනවා. දැන් තියෙන ප්රශ්නය තමයි අපිට මේ ණය ගෙවන්න ප්රමාණවත් ඩොලර් තියෙනවාද කියන එක. මහ බැංකුවට අනුව 2021 දෙසැම්බර් 22 වන විට විදේශ සංචිත තත්ත්වය එ.ජ.ඩොලර් බිලියන 3.1 වෙනවා. මේකෙන් පෙනීයන්නේ අපිට මේ අවුරුද්දේ තියෙන ණය ටික ගෙවා ගන්නත් තව රටකින් උදව් ගන්න වෙනවා කියන එකයි. එතකොට තව අවුරුදු 5 ක් මේ විදියට අපිට රටක් විදියට ඉස්සරහට යන්න පුලුවන් ද? මේ ප්රශ්නය තවත් දරුණු වෙනවා මේ කෝවිඩ්-19 වසංගතයත් එක්ක, හැබැයි මේ ප්රශ්නය කොවිඩ් වසංගතය එන්න කලින් ඉදන්ම උග්ර වෙමින් තිබ්බා. අපිට අපේ මේ තියෙන ණය ගෙවන්න තව තවත් ණය ගත්තොත් අපි තවත් අමාරුවේ වැටෙනවා.
මේ සිදුවීම් සමඟ විවිධ පුද්ගලයින් අපි IMF එකට යන්න ඕනේ ද? නැද්ද? කියන එක ගැන විවිධ මත පල කලා. අපි IMF එකට ගියත් නැතත් වඩා වැදගත් වන්නේ රජයක් වශයෙන් මේ ණය ගෙවීමට අවශ්ය නියමාකාර ක්රමවේදයක් ඊලග අවරුදු 5 සදහා යෙදවිය යුතුයි. අපි රටක් ලෙස ප්රතික්රියාශීලි ප්රතිපත්ති (reactive policy) තුලින් ඇත් වී ක්රියාකාරී ප්රතිපත්ති (proactive policy) සදහා යොමු විය යුතුයි. මේ ණය අර්බුදයෙන් ගොඩ ඒමට නම් කෙටි කාලීන විකල්ප වලින් ඇත් වී, දුරදිග බලා කටයුතු කල යුතුමයි.
තත්සරණි සිරිවර්ධන
(2022.01.10)
